Salakyan sang tag-iya ang salon sa City Proper, ginlampusan sang bato kag botelya sang mga wala makilalal-an nga lalaki

ILOILO CITY — Nawasak ang windshield kag window sang salakyan sang tag-iya sang Salon de Pamplona nga naka-park sa General Luna St., City Proper matapos ginlampusan sang bato kag botelya sang wala makilal-an nga mga lalaki.

Suno kay Ducky Pamplona, tag-iya sang salakyan, ginpahibalo na lang siya nga na-damage ang iya salakyan.

Ginpahayag sang nagabantay sang salon kag base man sa CCTV camera footages nga mga las-3 sang kaagahon sang may nagdulog nga puti nga Toyota Vios sa atubang sang parking area, may nagpanaog nga mga lalaki kag ginlampusan ang salakyan ni Pamplona sang bato kag botelya sang softdrinks.

Sang nanotisyaran sang mga lalaki nga may tawo, gilayon sila nga nagpalagyo.

Ginpabutyag ni Pamplona nga mas maayo nga salakyan na lang ang na-damage sang sa may malain nga natabo sa nagabantay sang salon.

Indi pa makahambal si Pamplona kun sin-o ang may kahimuan bangud nagapadayon pa ang imbestigasyon. Pero suno sa iya, nahisa ang naghimo sini bangud sang iya mga achievements kag award.

Ginabanta sa P50,000 ang damage sa salakyan ni Pamplona.