Pila ka drivers, ginpamatukan ang LPTRP sang Iloilo City government paagi sa pagprotesta kaupod ang nagklain-lain nga cause-oriented groups

ILOILO CITY – Ginpamatukan sang pila ka mga drivers sang jeep ang ginapatuman nga Local Public Transport Route Plan (LPTRP) sang Iloilo City Government nga nagsugod subong nga Hunyo 12.

Ini paagi sa ginhiwat nga protesta sa Sunburst Park sa City Proper sang pila ka mga drivers kaupod ang pila ka cause-oriented groups.

Suno kay Rey Cachuela, presidente sang Nagkakaisang Transport sa Panay, nagapanawagan sila sa Iloilo City Government kag Land Transportation Franchising Regulatory Board (LTFRB) 6 nga suspendiron anay ang implementasyon sang LPTRP.

Sa pagsugod sang LPTRP, indi na pagpasugtan suno sa iya nga makabyahe ang drivers nga indi miyembro sang transport cooperative. Nanindugan ang grupo nga nagapabudlay lang sa mga drivers kag pasahero ang LPTRP.

Buwas, mahiwat liwat sang hublag protesta ang grupo bilang kabahin sang ila panawagan nga suspendiron ang implementasyon sini.