Punong barangay, patay sang gintiro sang riding-in-tandem sa Pontevedra, Capiz
CAPIZ – Patay ang punong barangay sang Brgy. Tabuc, Pontevedra, Capiz sang gintiro sang riding-in-tandem sa Brgy. Poblacion Ilaya sa amo nga banwa kahapon, Hulyo 7.
Ginkilala ang biktima kay Punong Barangay Frederick Dullano nga residente sang Poblacion Ilaya, Pontevedra.
Suno kay PMAJ Syril Punzalan sang Pontevedra MPS, halin sa Brgy. Tabuc kag papuli na kuntani sa ila balay sakay sa iya salakyan ang biktima sang gintiro.
Nakalab-ut pa sa ila balay si Dullano. Sang nakalab-ot sa ila balay, nagpanaog siya sa salakyan agud magpangayo sang bulig sa iya pamilya, pero nagpanaog man sa motorsiklo ang gunman kag gintiro ang kapitan.
Suno sa pamilya ni Dullano, nakita nila nga napilasan na ang kapitan sang nagpanaog sa salakyan. May lima ka pilas sa lawas ang biktima, dugang ni Punzalan.
Tatlo ka asud-asud nga lupok ang nabati-an sang mga testigo. Madasig nga nagpalagyo ang mga suspetsado.
Sa imbestigasyon sang Pontevedra police, nakasuksok sang face mask, yellow green nga t-shirt kag yellow shorts ang gunman, samtang naka-jacket nga itom kag naka-facemask naman ang driver sang motorsiklo kag lunsay mga wala naka-helmet.
May ginasundan naman nga lead kag motibo ang kapulisan apang indi pa mapahayag ni Punzalan bangud nagapadayon ang ila imbestigasyon.– via Aksyon Jil Caceres
