3,493 ka 4Ps beneficiaries sa Western Visayas, natalana kakason sa listahan suno sa DSWD
ILOILO CITY – Nagalab-ot sa 3,493 ka benepisaryo sang Pantawid Pamilyang Pilipino Program (4Ps) sa Western Visayas ang natalana nga kakason sa listahan suno kay Mrs. Belen Gebusion, 4Ps Division chief sang Department Social Welfare and Development 6.
Base ini sa data halin Enero tubtob Hulyo 7, 2022.
Paathag ni Gebusion, gina-update nila kada bulan ang listahan sang mga benepisyaryo.
Base sa Implementing Rules and Regulation sang 4Ps Program, kakason ang pamilya sa listahan sang mga benepisaryo kun:
a. Nag-19 anyos na ang last monitored child;
b. Nakatapos na sa high school ang last monitored child;
c. Nakalab-ut na ang household sa 7-year duration sang programa;
d. Indi na ‘pigado’ ang household, base sa latest assessment paagi sa gin-adoptar nga standardized targeting system;
e. Boluntaryo nga gin-waive sang household ang ila membership sa programa; ukon
f. May nahimo nga offense ang household sa diin ang sanction amo ang pagkakas sa listahan, subject sa standards nga gin-develop sang DSWD.
Lakip lang sa mga offense, suno kay Gebusion, ang pagprenda sang ATM card kag pagsugal gamit ang kwarta halin sa 4Ps.
Una na gin-anunsyar ni DSWD Sec. Erwin Tulfo, nga malapit isa ka milyon ka ‘undeserving’ beneficiaries ang pagakakason sa listahan agud makabulos man ang mga yara sa waiting list. Sa latest data sang DSWD, ginabanta sa 4.4 million ang benepisaryo sang 4Ps.
