ICPO, naka-monitor sang mga nagbalik sa illegal drug activities sa Bakhaw, Mandurriao

ILOILO CITY – Naka-monitor ang Iloilo City Police Office sang mga nagbalik sa illegal drugs trade sa Brgy. Bakhaw, Mandurriao.

Ginkumpirmar ini ni ICPO Director PCOL Leo Batiles kasunod sang request ni Punong Barangay Joel Alvarado nga mag-deploy sang kapulisan sa ila barangay bangud sa pagbalik sang illegal activities.

“May na-monitor kita dira [sa Bakhaw, Mandurriao] nga naga-engage sa illegal drugs. May ara kita napasulod sa watchlist, kag ini sila nabutang sa surveillance. May ara na kita napasulod sa target list,” suno kay PCOL Batiles.

Sa record nga gina-uyatan ni Batiles, masobra 10 na ka personalidad ang ila na-monitor nga naga-engage sa illegal drugs sa Bakhaw, iban sa ila ang may previous cases may kaangtanan man sa ginadumilian nga druga.

Nag-deploy ang ICPO sang 22 ka pulis sa Bakhaw kasunod sang request ni Punong Barangay Alvarado.