Concern sa pagpalip-ot sang ruta sang mga PUJs halin sa MIGEDC members talakayon sa meeting sang Iloilo provincial government, City government kag LTFRB 6

ILOILO – Magasapol ang representatives sang Iloilo Provincial Government, Iloilo City Government kag Land Transportation Franchising and Regulatory Board (LTFRB) 6 sa Sabado, Setyembre 3, agud talakayon ang mga concerns sa Local Public Transport Route Plan.

Suno kay Mr. Mario Nillos, head sang Provincial Planning and Development Office, “Concern gid naton kay kun idiskarga sa BIR [Molo] ang mga pasahero, basi bala mabudlayan [sila] magsakay. Pareho man sa Leganes kun idiskarga [ang mga pasahero] sa Jaro Plaza. Usually puno na ang mga jeep especially during peak hours. Ano ang sakyan sang mga pasahero?”

Sa presentasyon sang LPTRP-Technical Working Group sang siyudad sa Transport Summit sang Agosto 30, 2022, pasugtan nga makasulod sa Iloilo City ang depasahero nga mga jeep halin sa mga banwa nga miembro sang Metro-Iloilo Guimaras Economic Development Council (MIGEDC), pero palip-utan ang ruta.

Ginaduso naman sang probinsya nga padayunon lang ang ruta sang mga first town jeepneys.

May himuon suno kay Nillos nga final discussion nga i-mediate sang LTFRB.

Gin-athag ni Nillos nga nahangpan sang probinsya ang concern sang City Government bangud nabutang sa guidelines sang Department of Transportation sa LPTRP nga indi pwede ang overlapping sang mga ruta. Pero lain ang sitwasyon sa siyudad kag probinsya suno kay Nillos kag nagalaum siya nga makonsiderar ang DOTr.

May maabot nga undersecretary sang DOTr sa Iloilo sa masunod nga semana suno kay Nillos. “Ipresentar namon ang proposal sang siyudad, ang proposal sang probinsya paagi sa mediation sang LTFRB… We are hopeful nga ma-intiendihan sang DOTr.” –via Aksyon Hotline