NBI 6 ma-interview kay Estancia Killings lone survivor Jevron Parohinog

ILOILO — Ma-interview ang National Bureau of Investigation (NBI) 6 sa Estancia killings lone survivor nga si Jevron Parohinog sa ila gina-conduct nga parallel investigation.

Suno kay Atty. Jeremiah Sargado, Assistant Regional Director sang NBI 6, ginpahanugutan na ni Atty. Hector Teodosio, abogado ni Parohinog, nga istoryahon nila ang iya kliyente subong nga semana.

Ginpahayag ni Sargado nga mas maayo nga upod ni Parohinog ang iya nga abogado samtang gina-interview siya sang NBI agent may kaangtanan sa kamatayon sang tatlo ka mag-abyan nga sanday JP Bosque, Floyd Fernandes kag Mark Libao.

Sa subong, indi pa matumod sang NBI 6 kun may natabo nga robbery bangud nagapadayon pa ang imbestigasyon.

Magluwas diri, may natipon man nga duha ka dugang nga statement ang NBI 6 halin sa mga testigo kag padayon nila nga gina-validate. Ini ang natabo antes nagpa-Estancia ang mag-abyan suno kay Sargado.

Indi pa matul-id suno kay Sargado kun masobra isa ang crime scene bangud ma-conduct pa sang luminol test ang Parohinog-Libao-Bosque-Fernandes (PALIBOSFER) Special Investigation Task Group.

Padayon ang pagpakig-angut sang NBI 6 sa SITG sa resulta sang mga tests kag mga nagagwa sa ila ginahimo nga imbestigasyon.