Mga ferry cooperatives sa Guimaras ginapasumiter sang stowage plan sang MARINA 6 agud pasugtan ang pagkarga sang bisikleta
ILOILO CITY – Ginhatagan sang isa ka bulan sang Maritime Industry Authority (MARINA) 6 ang mga Ferry Boats Cooperative nga nagabyahe Iloilo pa-Guimaras kag vice versa nga magsumiter sang stowage plan.
Ang stowage plan, amo ang pagplastar sang kooperatiba kun diin nga parte sang Ferry Boats ang butangan sang bisikleta kun i-transport ini sa nasambit nga ruta para sa safety.
Ini ang nangin resulta sang pagsapol sang taga-MARINA 6 kay Iloilo City Mayor Jerry Treñas kag Guimaras Governor JC Rahman Nava kasunod sang pagpangayo nila sang paathag bangud sa pagdumili sa pagkarga sang bisikleta sa mga ferry boats.
Ginbuyagyag ni MARINA 6 Director Jeffrey Bangsa nga nakabaton sila sang reklamo nga may mga ferry boats nga nagakarga sang cargoes pareho sang bisikleta bangud nagabalabag ini sa mga exit areas sang sakayan.
Bangud sini, gin-review sang MARINA 6 ang kaundan sang Certificate of Public Convenience (CPC) sang mga ferry boats kag natukiban nga wala madala nga ginapasugtan ang pagkarga sang mga cargoes.
Pero suno kay Bangsa kun makapakita sang stowage plan ang mga kooperatiba, pasugtan nga makakarga sang apat ka mga bisikleta sa mga fiber boats samtang walo sa mga dalagku nga sakayan pareho sang Yohan.
Nagpangayo man sang pasaylo si Bangsa kay Treñas kag Nava bangud wala sila naka-coordinate gilayon sang ginpatuman ang regulasyon sang MARINA 6.
