Lalaki nga nagbaligya sang indi lisensyado nga pusil online, nadakpan sa entrapment operation sa Jaro
ILOILO CITY — Nadakpan sa entrapment operation sang City Intelligence Unit sang Iloilo City Police Office ang lalaki nga nagbaligya sang indi lisensyado nga pusil paagi sa iya social media account.
Na-aresto sa San Pedro, Jaro kahapon, Oktubre 31, si Normie Maglansacay, 41-anyos, tumandok sang Barangay Carmencita, President Roxas, Capiz kag temporaryo nga nagatenir sa MH del Pilar, Jaro.
Suno kay PLt Col Albert Sy, head sang CIU, nakita nila ang post sang subject sa Facebook rason nga ila gin-chat kag gintransaksyon.
Nagapamilit naman ang subject nga baklon ang pusil sa balor nga P10,000, apang gin-ayo ini sa 9,400 pesos tubtob nga naghisugot sa presyo.
Na-recover kay maglansacay ang 357 caliber revolver nga may panas nga serial number, duha ka bala, buy bust money nga 9,400 pesos kag cellphone.
Ginrason sang subject suno kay Sy nga ginbaligya niya ang pusil agud ibayad sa iya mga utang.
Ginahibalo pa sang CIU ang background ni Maglansacay.
Natalana pasakaan sang kaso nga illegal possession of firearms and ammunition si Maglansacay.
