Balasan police may 2 ka persons of interest sa pag-ransack sa baligyaan sang alahas, cellphones sa Gaisano mall sa Balasan

ILOILO — May duha ka persons of interest na ang Balasan Police sa pagransak sa baligyaan sang mga alahas kag cellphones nga nahamtang sa Gaisano mall sa Balasan sang Disyembre 5.

Suno kay Police staff Sergeant Eddiemar Magbanua, imbestigador sang Balasan Police Station, taga-Dumangas kag taga-Capiz ang duha ka persons of interest nga posible may kahilabtanan sa pagransak sa F&C Jewelry.

Nagpamalibad si Magbanua nga hingadlan bangud gina-validate pa nila dugang ang duha.

Ginahulat na lang sang Balasan police, suno kay Magbanua ang resulta sang finger prints sang mga empleyado kun may kahilabtanan sila sa insidente.

P3.5 million nga balor sang mga alahas cash, P359,000 nga balor sang mga cellphone units kag P36,000 nga cash nga natago sa vault ang nataban sang mga kawatan.

Ginapatihan sang Balasan police nga nag-agi sa fire exit ang mga suspects.