ILOILO CITY — Mapaligad sang gab-i sa evacuation centers ang pila ka mga residente nga nagub-an sang balay sang ginlabayan sang buhawi sa Barangays Sta. Cruz kag Sto. Domingo, Arevalo kahapon sang kaagahon. Enero 3.
Base sa data sang City Disaster Risk Reduction and Management Council (CDRRMC) 17 ka balay ang nawasak gid—lima sa Sto. Domingo kag 12 sa Sta. Cruz. Samtang 39 naman ka mga balay ang partially damaged – 23 ang na-record sa Sto. Domingo kag 16 sa Sta. Cruz.
Sa kabug-usan, 86 ka pamilya ang naapektuhan – 42 sa Sto. Domingo kag 44 sa Sta. Cruz.
Suno naman sa City Social Welfare and Development Office (CSWDO) may mga pamilya nga nagtenir sa Barangay Chapel kag Day Care Centers samtang may temporaryo nga nagdangop sa ila himata.
