ILOILO CITY – Na-atrasan sang back hoe ang construction worker sa gina-obra nga karsada sa Barangay Guzman-Jesena, Mandurriao pasado las-10 kahapon sang aga, Enero 7
Gindala pa sa ospital si Johndy Agsamosam sang Ajuy pero wala natabangan bangud sang pilas sa ulo.
Sa imbestigasyon ni PSMSg Alfredo Masamong, traffic investigator, wala natalupangdan sang operator sang back hoe nga si Jilbert Macasia sang Tapaz, Capiz si Agsamosam nga nagaserbe niya nga spotter.
Suno naman kay Macasia, “wala ko kakita sa iya nga ara na siya sa likod. Tago gid siya.”
Ginpahayag ni Macasia nga nagdulog siya gilayon sang nabatyagan nga may naglagabong. Nagatalikod suno sa iya si Agsamosam sang nalasakan sang back hoe.
Nagapangayo naman si Macasia sang pasaylo sa pamilya ni Agsamosam. “Indi ko gid hungod ang natabu.”
Masobra 11 ka tuig na nga naga-operate sang back hoe si Macasia.
