Curfew for minors sa Iloilo City istrikto nga ipatuman sa Dinagyang 2023

Istrikto nga ipatuman sang kapulisan ang curfew para sa mga menor-de-edad halin las-10 sang gab-i tubtob las-4 sang kaagahon sa Dinagyang Festival 2023.

Suno ini kay Police Captain Julieta Sequio, spokesperson sang Site Task Group Dinagyang Festival 2023.

Pahanugutan naman suno kay Sequio ang mga menor-de-edad nga may upod nga guardian ukon ginikanan nga nagalagaw.

Kun wala sang guardian nga upod kag nagapasaway, dal-on ang menor-de-edad sa Department of Social Welfare and Development (DSWD) 6 para sa nagaka-igo nga intervention.

Gin-athag ni Sequio nga bisan wala pa sang Dinagyang, hugot na nila nga ginapatuman ang curfew for minors.

Nagpanugyan man si Sequio sa mga pumuluyo nga magkooperar agud mangin matawhay ang pagselebrar sang Dinagyang Festival 2023.