Tribu La Paz 98% na nga preparado para sa Dinagyang ILOmination

ILOILO CITY—Halos 98% na nga preparado ang Tribu La Paz para sa Dinagyang ILOmination competition sa Enero 21.

Suno sa tribe manager nga si Mr. Ariel Sogueco, may katapusan sila nga blocking buwas sa gab-i, kag nakahanda naman ang gamiton nila nga costume para sa kompetisyon.

Kalabanan sa mga nag-entra sa Tribu La Paz ang mga dancers sadtu sang Tribu Paghidaet sang La Paz National High School nga nagkapasakop man sa Dinagyang tribes competition, suno kay Sogueco.

“They’re experienced dancers nga ginatawag… Tanan sila mga sagad gid magsaut kay kinahanglan gid sa ILOmination bongga gid ang ipakita,” suno kay Sogueco.

Ginabug-usan ang tribu sang 35 ka mga dancers kag 20 ka musicians .

Hiwaton ang Dinagyang ILOmination sa tatlo ka judging areas – SM City Iloilo, Atria, kag Megaworld sa Mandurriao.

Ginatiglawas sang mga competing groups ang pito ka distrito sa syudad.