ILOILO CITY — Nagsinggitan ang US national sa Malasakit Center sa Western Visayas Medical Center sa Mandurriao tungod ulihi na lang siya ginpahibalo nga kinahanglan niya magbayad tungod indi siya Filipino citizen.
Suno kay alyas Manny, nagpadulong siya sa Malasakit Center agud ipa-check up ang nagasakit niya nga wala nga parte sang tiyan.
Dugang niya, tatlo na ka personnel ang iya na-istorya nga naghambal nga wala sang bayad ang mga test nga ginhimo sa iya.
Apang sang yara na siya sa counter, ginkakibot niya nga ginsukot siya sang P1,200.
Ginpabutyag ni Manny nga naglain ang iya buot sang ginhambal sang personnel nga kinahanglan niya magbayad tungod foreigner siya.
Suno kay Manny, mabayad man siya kun sa una pa lang ginhambal na sang mga personnel nga indi libre ang serbisyo para sa ila nga mga foreigners.
Las-5:45 pa lang kaina sang kaagahon, Pebrero 1, nagpila na si Manny sa Malasakit Center. Natabu ang iya pagsinggitan pasado las 10 sang aga.
Na-settle lang ang indi pag-intindihanay sang may pulis na nga nag-abot sa area.
Siyam na ka tuig nga nagatenir sa pungsod si Manny.
Ginatinguhaan pa sang Aksyon Radyo Iloilo nga makuhaan sang statement ang management sang Malasakit Center.
