75 personnel sang Mandurriao Police Station, 15 personnel sang CDEU gin-relieve

ILOILO CITY – Indi lang mga chiefs of police sang nagkalain-lain nga police stations sa siyudad sang Iloilo ang ginpang-relieve sugod kahapon, kundi lakip man ang mga personnel sang Mandurriao Police Station kag City Drug Enforcement Unit (CDEU).

Ini ang ginkumpirmar ni PMAJ Shella Mae Sangrines, spokesperson sang Iloilo City Police Office, subong nga adlaw.

Suno kay Sangrines, 75 ka mga personnel sang Mandurriao Police Station kag 15 ka personnel sang CDEU ang ginpangkakas.

Pagabuslan sang 75 man ka mga personnel halin sa nagkalain-lain nga police stations ang mga ginpangkakas nga personnel sa Mandurriao Police Station.

Ang 15 naman ka mga personnel sang CDEU nga ginpangkakas ang pagabuslan sang mga bag-o nga operatiba nga ginpaidalum sa vetting process.

Sa vetting process suno kay Sangrines, gina-check ang records, background kag reputation sang mga personnel agud masigurado nga wala sila sang koneksyon sa ano man nga illegal nga aktibidad ilabe na sa illegal nga druga. – via ICPO