ILOILO—Gintampukan na sang duta ang ginkabkab nga porsyon sang dalan nga una ginreklamo sang residente sa Ungka II, Pavia, nga ginbutangan sang tamburong para sa drainage system pero wala na ginbalikan sang taga-IBC sang halos isa ka semana.
Ginpadulungan sang Aksyon Radyo news team ang area sang Pebrero 8 kag nakita ang ginbutang nga temporaryo nga latayan pasulod sa balay nga naga-uyog kun laktan.
Ginkahangaw-an man sang tagbalay ang nagbara nga tubig nga ginpugaran sang mga lamok.
Pagkasunod nga adlaw, Pebrero 9 ginbalikan sang kontraktor nga IBC ang lugar kag gintampukan ang ginkabkab mga duta.
Suno kay Juliet Arceo nga tag-iya sang balay, base sa iya pagpangusisa sa taga-IBC, wala nila ginpadayon ang pagkay-o sang drainage kag naglab-ot sa isa ka semana nga wala ginbalikan ang obra tungod nagahulat lang man sila sang abiso halin sa DPWH 6.
Pero tungod sa sunod-sunod nga reklamo nga ila nabaton, gintampukan na lang nila sang duta ang area.
Suno kay Arceo, balikan kag kabkabon na lang liwat sang taga-IBC ang wala matapos nga drainage system kun makabaton na sila sang masunod mga plano halin sa DPWH 6.
