ILOILO — Labaw ang educational attainment ni Police Colonel Rolando Palomo rason nga siya ginpili ni Iloilo Governor Arthur Defensor, Jr. nga mangin director sang Iloilo Police Provincial Office (IPPO) .
Suno kay Defensor, alalangay lang ang credentials kag background nanday IPPO OIC Police Colonel Noel Aliño kag Police Colonel Gervacio Balmaceda, Jr., nga lakip sa mga ginpilian sang gobernador.
Gin-athag man niya nga nag-comply lang siya sa procedure sang Philippine National Police (PNP) kag ginhimo man niya ang iya obligasyon bilang local chief executive.
Magluwas diri, ginbasehan man sang gobernador ang ginpasa nga resume kag reports sang tatlo ka mga applicants antes naghimo sang desisyon.
Gin-aku ni Defensor nga nagpanawag siya sa mga reference nga nakabutang sa ila papeles kag mga nakakilala sa ila agud nga mabuligan siya sa pagpili sang magapamuno sa mga police sa probinsiya.
Napadala na sang Police Regional Office 6 sa Camp Crame ang rekomendasyon ni Defensor kag ginahulat na lang ang opisyal nga appointment ni Palomo.
