Bag-o ginbun-ag nga lapsag nautod ang tiil sang gintaban sang ido

CAPIZ — Na-utod ang tuo nga tiil sang bag-o ginbun-ag nga lapsag nga babaye sang gintaban sang ido sa Barangay Tiza, Roxas City.

Suno kay PEMS Ramil Arcangeles, spokesperson sang Roxas City PNP, ginbilin sa bakante nga lote nga himuon kuntani nga subdivision ang lapsag.

Posible suno sa iya nga nasimhutan sang ido ang dugo sa bayo sang lapsag.

Ginabanta sa 30 ka metro ang kalayuon sa pagguyod sang ido halin sa ginbilinan sa lapsag.

Nakita na lang sang tag-iya sang ido ang lapsag nga yara sa idalum sang ila pulungkuan nga nagahibi kag gilayon nga gindala sa ospital.