2 ka bulan nga lapsag nalapnos ang panit sang nasunog ang ila balay sa Passi City

ILOILO—Nalapnos ang nagkalain-lain nga parte sang lawas sang duha ka bulan nga lapsag nga lalaki sang nasunog ang ila balay sa Brgy. Agtambo, Passi City las-6:50 kahapon sang aga, Pebrero 25.

Ginapanag-iyahan ang balay ni Mylene Pacheco, 25-anyos.

Suno sa iya bayaw nga si Cherry Mae, brownout sa ila lugar halin kagab-i tubtob kaina sang aga rason nga nagsindi si Mylene sang kandila kag gintungtong ini sa lamesa.

May ginbakal lang si Mylene sa tiyangge kag ginbilin ang iya duha ka bulan nga lapsag nga lalaki kag ang iya pito ka tuig nga bata nga nagakatulog sa ila balay.

Nakibot na lang si Mylene sang nagadaba-daba na ang ila balay sang iya pagpauli kag nagahibi na sa guwa ang iya pito ka tuig nga bata.

Ginsulod ni Mylene ang balay agud hingagawon ang iya nga lapsag.

Nagdumdom siya sa umpisa nga patay na ang lapsag tungod tama na ka kadako ang kalayo. Pero nakita niya nga naghulag ang tiil rason nga ginrisguhan niya nga kuhaon ang lapsag.

Sa duyan nagakatulog ang lapsag apang tungod sa kalayo, nabugto ang higot sini kag nahulog siya sa salog nga may foam.

Nagadaba-daba naman ang foam rason nga nalapnos ang panit sang lapsag.

Posible suno kay Cherry Mae nga naupod ang kandila nga natungtong sa lamesa nga gintunaan sang sunog.

I-refer sa ospital sa syudad ang lapsag tungod 20% sang iya nga panit ang nalapnos. Napaso man si Mylene sa guya, kamot, kag tiil.

Nagapanawagan sang bulig ang pamilya Pacheco para sa inug-gasto nila sa ospital kag inugbakal sang ointment kag diaper sang lapsag. Makig-angut lang sa numero 09466401389.