PCOL Ronaldo Palomo may mandu na halin sa PNP headquarters nga pamunuan ang IPPO

ILOILO – May mandu na halin sa Philippine National Police (PNP) Headquarters nga pamunuan ni Police Colonel Ronaldo Palomo ang Iloilo Police Provincial Office (IPPO).

Ginkumpirmar ni Police Major Mary Grace Borio, spokesperson sang Police Regional Office (PRO) 6 nga may “guidance” na si PCOL Palomo. Pebrero 27, nag-abot ang order halin sa headquarters.

Suno kay Borio, kinahanglan pa nga mag-courtesy call ni Palomo kay PRO 6 Director Leo Francisco antes siya papanaugan sang order kag pormal nga magapungko nga director sang IPPO.

Si Palomo ang na-assign sa Personnel Holding and Accounting Unit sa National Headquarters antes siya napilian ni Iloilo Governor Arthur Defensor, Jr., nga magabulos nga provincial director sang IPPO.

Buslan ni Palomo si IPPO OIC Noel Aliño. Wala pa mahibaluan kun diin ang masunod nga assignment ni Aliño.

Una na nga ginpahayag ni Defensor nga educational attainment ni Palomo ang isa sa mga ginbasehan niya agud pillion nga masunod nga director sang IPPO.