ILOILO — Ginkumpirmar ni PCol Joeresty Coronica, OIC sang Iloilo City Police Office, nga nadakpan ang isa tatlo ka hold-uppers nga nagsulod sa opisina sang J&T Express sang Marso 1 sang gab-i .
Suno kay Coronica sa Barangay Guinobatan, Leganes nadakpan ang suspek.
Gin-identify ang suspek kay John Mark Lebuna alyas Botbot, 22 anyos sang Jaro.
Nadakpan si Lebuna sa balay sang iya nobya nga 17-anyos.
Suno sa nobya nga si alyas Rose, nagakaon si Lebuna sang nag-abot ang mga pulis kag ginposasan ang iya nobyo.
Ginpanginwala suno sa iya ni Lebuna ang kahilabtanan sa pagpanghold-up.
Dugang pa ni Rose nga yara sa Ungka si Lebuna sang natabo ang pagpanghold-up.
Sa interview sang Aksyon Radyo news team, gintudlo ni Lebuna si “Tan-Tan” nga sa likod sang pagpanghold-up. Pero wala na siya naghatag sang dugang nga detalye.
Suno sa iya, masami nga “biyahe” sang grupo ni Tan-Tan ang pagpanghold-up.
Hugot naman nga ginapanginwala sang iloy nga si Maricar nga may kahilabtanan ang iya bata sa pagpanghold-up sa J&T Express.
Suno kay Maricar, maayo ang iya bata kag nagakadalahig lang sa barkada.
‘AGI NI TAN-TAN’
Nanginwala ang isa sa tatlo ka suspek sa pagsulod sa J&T Express sa Quintin Salas, Jaro kag pag-hold up sa mga personnel sang Marso 1 sang gab-i.
Suno kay John Mark Lebuna, 22 anyos sang San Isidro, Jaro, wala siya sang kahilabtanan sa krimen.
Pero may gintudlo siya nga amo suno sa iya ang nagpang-hold-up.
“Ila to ni Tan-Tan agi ya. Ila gid na ya biyahe. Wala lang ko kakilala sang duha [niya ka upod]. Wala [to] ko ‘ya,” suno kay Lebuna.
Nadakpan si Lebuna sa balay sang iya 17 anyos nga nobya sa Brgy. Guinobatan, Leganes kaina sang aga.
