Regular threat assessment sa mga local chief executives sa Iloilo province ginmandu ni Gov. Arthur Defensor, Jr. sa IPPO
Nagmandu si Iloilo Governor Arthur Defensor, Jr. kay Iloilo Police Provincial Office (IPPO) Director Police Colonel Ronaldo Palomo nga mag-conduct sang regular nga “threat assessment” sa mga local chief executives sang probinsiya.
Ginhimo sang gobernador ang mandu sa ginpatawag nga meeting sa League of the Municipalities of the Philippines Iloilo Chapter.
Suno kay Palomo, luyag sang gobernador nga ma-institutionalize ang proseso agud mahibaluan kun may mga pamahog nga nabaton ang mga alkalde sa sulod sang tatlo ka bulan.
Gin-istoryahan man sa meeting ang proseso sa pag-request sang mga alkalde sang police security.
Tutukan ni Palomo ang pagpahamtang sang mga security survey inspection sa mga alkalde agud mahibaluan kun may mga pamahog sa ila.
Una na nga ginpabutyag sang gobernador nga gin-istoryahan sa security briefing upod sa Department of the Interior and Local Government (DILG) kag Philippine National Police (PNP) nga ginhiwat sa Camp Crame nga makabulig ang mabaskog nga koordinasyon sa mga alkalde; Pag-improve sang “intelligence work” sang kapulisan kag ang pag-deploy sang police security sa mga opisyal agud matapna gilayon ang insidente pareho sang “Pamplona massacre.”
