North Baluarte, Molo PB Marites Morga handa nga magpanaug sa pwesto para sa pagbalik ni former PB Allan Aurelio

ILOILO CITY — Handa si North Baluarte, Molo Punong Barangay Marites Morga nga magpanaug sa puwesto sa natalana nga pagbalik ni former Punong Barangay Allan Aurelio nga gin-dismiss sadto sang Ombudsman tungod sa kaso nga Anti-graft and Corrupt Practices kag Malversation of Public Funds nga ginpasaka batok sa iya sang 2015.

Suno kay Punong Barangay Morga, nahangpan kag nabaton niya nga temporaryo lang ang pagpungko niya bilang kapitan tungod nagkaproblema sadto si Aurelio kag wala gid ini sang problema sa iya.

Ginpangabay lang ni Morga nga mahatagan siya sang kopya sang mga papeles sa pag-reinstate kay Aurelio agud mapaathagan siya dugang sang iya abogado.

Nahibaluan nga nag-apelar sa Court of Appeals (CA) si Aurelio kag October 2020 nagpaguwa sang desisyon ang CA nga nagabawi sa penalidad sang Ombudsman kag gin-islan lang ini sang isa lang ka bulan nga suspensyon.

Kaina sang aga, ginpatawag sang City DILG sanday Morga kag Aurelio agud pahibaluon nga ipatuman ang desisyon sang Court of Appeals.

Sa pihak sini, ginpabutyag ni Morga nga mapapili naman siya sa pagka-kapitan sa maabot nga Barangay kag SK Elections.