Volleyball team nga taga-Calinog nag-kampeon sa Division of Iloilo Sports Council Meet 2023 bisan nakatini-il sa ila hampang
Napilitan nga magtini-il ang mga players sang volleyball girls sang Malitbog Elementary School sang Calinog, Iloilo agud indi mabudlayan sa ila championship game sa ginhiwat nga Division of Iloilo Sports Council Meet 2023.
Ginrepresentar sang eskwelahan ang 3rd District of Iloilo batok sa mga taga-5th District.
Suno sa coach sang team nga si Mr. Ben Araneta, nagakadanlog ang ila players rason nga indi makahampang sang maayo tungod baratuhon kag indi pang-volleyball ang ginasuksok nila nga mga sapatos. Sang nalapawan na sang kontra ang ila score, nag-ayo sila sa referee kun pwede nga makatini-il.
Pigado suno sa iya ang pangabuhi sang mga estudyante gani wala sila sang ikasarang nga magbakal sang sapatos. Dugang niya, ginapanghatagan niya na lang ang iban sang mga daan nila nga sapatos sa balay agud may magamit sa pag-practice.
Nahangpan niya man nga wala sang budget ang eskwelahan agud mag-sponsor sang sapatos sang mga players. Indi man masarangan sang banwa nga mag-provide tungod madamo pa sila sang ginagastuhan pareho sang pagkaon kag lodging sang iban pa nga mga players.
Sa pihak sang ila kabudlay, nagkampeon ang team kag sila ang mangin tiglawas sang Iloilo Province sa hiwaton nga Inter-Division Meet batok sa mga delegado sang Iloilo City, Passi City, kag Iloilo PRISAA sa Abril 15 tubtob 17.
