Masobra P8.1 million nga balor sang suspected shabu nga nabutang sa karton sang gatas na-recover sa buy bust operation sa Jaro
ILOILO CITY — Na-recover ang P 8,160,000 nga balor sang suspected shabu sa duha ka mga indibidwal lakip na ang ginakabig nga Regional Priority Target High Value Individual (HVI) sa Zone 6, Brgy. Buhang, Jaro las-2 kahapon sang hapon, Marso 27.
Ginkilala ang subject kay Noe Llagas, Jr. alias JR, 27, sang Brgy. Ungka, Jaro. Nadakpan man ang HVI nga si Estrelita Bueno alias Madam Ester, 68-anyos, sang Abbey Road, Bagbag Sauyo Novaliches, Quezon City.
Suno kay Police Major Rommel Anicete, head sang Regional Police Drugs Enforcement Unit (RPDEU) 6, si Llagas ang ila ka-transaksyon pero nakamuno siya nga pakadto pa lang ang nagadala sang supply sang illegal drugs kag sa Jaro niya kuhaon.
Kadungan sini, na-monitor man sang operatiba nga padulong sa Iloilo si Bueno nga naghalin pa sa Batangas port, nagsakay sa RORO vessel via Caticlan pa-syudad, gani nagduda sila nga konektado ang duha.
Tungod sini, nag-demand pa sang dugang nga item ang police poseur buyer suno kay Anicete bisan nahibaluan nila nga wala sa possession ni Llagas ang daku nga supplies.
Pag-abut ni Bueno sa Buhang, Jaro, ginpakilala ni Llagas ang police posuer buyer kag nagdeklarar nga buy bust operation ang operatiba.
Nabaklan si Llagas sang isa ka sachet sang suspected shabu sa balor nga P72,000. Na-recover pa gid ang dugang nga anum ka dalagku nga sachets sang suspected shabu kay Llagas kag lima ka sachets kay Bueno.
Sa pagpangusisa sang police, mga anum ka bulan na nga na-monitor ang pagbalik-balik ni Bueno halin sa Manila pa-Iloilo kag nagadala sang illegal drugs.
Ginalakip ni Bueno sa mga groceries, pan-os nga sud-an, lago nga bayo, kag iban pa ang gina-transport niya nga suspected illegal drugs agud indi ma-detect sang sniffing dogs suno sa police.
Nagdepensa si Bueno nga ginsugo lang siya nga magdul-ong sang groceries kabaylo sang kwarta.
Ginapanginwala man ni Llagas nga nagabaligya siya sang illegal drugs.
