Dakup ang job hire employee sang Iloilo City Government sa gin-conduct nga drug buy bust operation sa Brgy. San Isidro, Jaro pasado las-3 kaina sang kaagahon.
Ginkilala ang subject kay Stewart Macatual, 38-anyos.
Na-recover kay Macatual ang walo tanan ka plastic sachets sang suspected shabu nga nagabug-at sang 17 grams kag nagabalor P115,600.
Suno kay PCapt. Lester Oliveros sang Jaro Police Station, malapit isa ka bulan nila nga gin-monitor si Macatual.
Sa monitoring sang kapulisan, miyembro sang Iloilo City Anti-Smoking Task Force (ICAST) si Macatual. Gin-ako sang subject nga sa City Hall siya naga-ubra, suno pa kay Oliveros.
Dugang sang pulis, sa Muntinlupa ukon sa New Bilibid Prison nagahalin ang supply ni Macatual.
Ginahulog kay Macatual ang drug items sa specific area kun diin dapat niya kuhaon kag ginadul-ong lang ni Macatual sa kun diin ang may nag-transaksyon ukon nagabakal sa iya, suno pa kay Oliveros.
Ginpaidalum sa drug test si Macatual, suno pa kay Oliveros.
Ginatinguhaan pa sang Aksyon Radyo Iloilo nga makuhaan sang statement ang subject kag ang head sang ICAST.
![Wala na masyado sang mga dalagko nga [supplies sang illegal drugs] nga nagasulod sa [Iloilo City] — ICPO PCOL Joeresty Coronica](https://aksyonradyoiloilo.com.ph/wp-content/uploads/2023/04/icpo-1.jpg)
