Iloilo City Councilors Nava, Cabaluna diutayan lang magtapungulay sa session sang Konseho

Iloilo City – Wala naluyagan ni Councilor Plaridel Nava ang mga side comments ni Councilor Sedfrey Cabaluna samtang naga-render si Cabaluna sang iya committee report may kaangtanan sa Enhanced Local Public Transport Route Plan (LPTRP) sang siyudad.

Ginkonsiderar ini ni Nava nga insulto gani gintawag niya si Cabaluna nga “basa baba” kag “out of order.” Gintulok man ni Nava sang masakit si Cabaluna.

Ginpalapitan ni Nava si Cabaluna apang ginpatung-an sila sang sergeant-at-arms sang City Council agud indi na maglala ang gamo.

Gin-athag naman ni Nava nga wala siya sang intensyon nga tapungulon si Cabaluna. Wala niya lang naluyagan ang pagtawag sa iya ni Cabaluna nga ‘Manong Nava’ samtang naga-session sila tungod pareho man sila nga konsehal kag abogado.

Samtang, nag-sorry si Cabaluna sa pagtawag kay Nava nga manong. Suno sa iya nagkumusta pa siya kay Nava pagkatapos sang ila session tungod indi man personal ang nagakatabu sa session hall.

Ginpabutyag pa ni Cabaluna nga nagapakita lang siya sang respeto kay Nava sa pagtudlo sa iya kun ano ang dapat himuon.