Team Iloilo Overall Champion sa Secondary, Elementary Level Arnis Sport Event
Nakuha sang team Iloilo ang over-all champion sa Arnis sport event sa nagapadayon nga Western Visayas Regional Athletic Association Meet (WVRAA) 2023 nga ginhiwat sa Aklan.
Sa official result nga gin-release sang Department of Education (DepEd) 6, napa-uli ni Kyle Angelo Tiron ang silver medal sa anyo individual-single weapon category kag anyo individual sword and dagger-secondary boys level.
Tuman naman ang kalipay ni Carl Wayne Reyes sang siya ang gindeklarar nga gold medalist sa anyo individual-double weapon category.
Gold medalist man sa amu nga sporting event si Mary Clarlyn Alviar sa anyo individual-single weapon category-Secondary Girls. Samtang bronze medalist naman si Angel Grace Suede sa anyo sword and dagger weapon category.
Nalutos man kanday Aviar, Clemence Marie Alas, Emerald Jane Legardo kag Tiron, Reyes, Marc Alquin Canto, Paul Angelo Tiron ang ila kasumpong sa tanan nga team category sa arnis kag nakapauli sa bulawan nga medalya.
Nagpasalamat si Ryan Robles, trainer coach sang secondary team sa tanan nga nagsuporta sa iya mga estudyante ilabe na gid ang Cabatuan LGU.
Wala naman nagpapirde ang arnis elementary boys tungod naghakot man sang bulawan nga medalya ang tiglawas sang lloilo nga ginpangunahan ni Nathan Baladjia sang Graciano Lopez Jaena Elementary School.
Ang team Iloilo ang mangin tiglawas sang Region 6 sa Palarong Pambasa halin Huly 29 tubtob Agosto 5 nga hiwaton sa Marikina City.
Sa unofficial kag partial medal tally sang DepEd 6 as of April 27, 1pm, nagapanguna ang Iloilo sa may pinakamadamo nga Gold medal nga naglab-ot sa 25.
