Working student athlete sang Guimaras gold medalist sa wushu sport event – secondary boys category

Indi makapati ang “working student” nga pambato sang Guimaras nga si Romy Marquez, Jr. nga makapauli siya sang bulawan nga medalya sa s45kg category sa Wushu sport event- secondary boys level sa nagapadayon nga Western Visayas Regional Athletic Association Meet (#WVRAA2023) sa Aklan.

Si Marquez ang tumandok sang Brgy. Agsanayan, Buenavista, Guimaras kag naga-eskwela sa Agsanayan National High School.

Naga-obra siya sa talyer kada Sabado kag Dominggo agud nga may balunon sa iya pag-eskwela.

Suno kay Blessie Joplo, Coach ni Marquez, nabudlayan mag-focus sa training ang iya estudyante tungod nga ginapasulabi niya ang pag-obra sa talyer sang sa mag-attend sang iya training.

Dugang pa niya, kun maglisensya ang bata sa iya nga mag-obra ginahatagan na lang niya sang pahanugot.

Ginpabutyag man ni Joplo, lima ka adlaw antes ang WVRAA nagdesisyon si Marquez nga indi na siya magpadayon sa kompetisyon tungod nanugunan siya sa duha ka adlaw nga sweldo sa talyer.

Antes pa man ang hampang ni Marquez naka-experyensya pa siya sang pagpalanakit sang tiyan. apang sa pihak sini gindeklarar sa gihapon nga champion via unanimous decision kontra sa Iloilo.

Ikatatlo si Marquez sa lima ka mga mag-ululutod.

Si Marquez ang mangin tiglawas sang Western Visayas sa Palarong Pambansa nga hiwaton sa Marikina City halin Hulyo 29 nga magalawig tubtob Agosto 5.

Nakuha sang Guimaras ang 2nd runner-up sa Wushu-Secondary level.