Proposed ordinance ni Councilor Johnny Young nga naga-regulate sa oras sang pagbaligya sang mga ambulan ventors sa Iloilo City ginbasura city council

ILOILO CITY —Ginbasura sang Konseho ang proposed ordinance ni Councilor Johnny Young nga nagatuyo nga i-regulate ang oras sa pagbaligya sang mga ambulant vendors halin lang las-5 sang hapon tubtob las-5 sa kaagahon.

“This Committee finds that the Proposed Ordinance was without legal basis, considered as inconsistent to public policy, unfair and discriminatory, prohibits and does not regulate trade and does not uplift the standard of living and the quality of life,” suno sa committee report ni Councilor Rudolph Jeffrey Ganzon, Chairman sang Committee on Trade, Commerce and Industry.

Ginrekomendar naman sang komitiba ni Ganzon kay Young nga ikonsiderar ang general welfare ilabe na gid sang mga vendors nga nagapangita sang pangabuhian.

Ginarespeto naman ni Young ang desisyon sang iya kaupdanan sa konseho.

Suno sa konsehal, may advise sa iya si Iloilo City Mayor Jerry Treñas nga sundon ang rekomendasyon sang Committee on Trade, Commerce and Industry.

Ginpa-athag naman niya nga luyag lang niya nga i-regulate ang mga vendors sa syudad kag wala niya ginadumilian nga magbaligya.

Wala man siya nagapati nga may na-akig nga mga ambulant vendors sa iya tungod madamo sa gihapon nga mga manugbaligya ang nagapangayo sang bulig sa iya opisina.

“May yara man mga vendors nga nagapalapit sa aton, gapangayo man bulig sa aton nga dapat i-regulate kay kadamo na sang ambulant vendors” suno pa kay Young.