Masobra P13 million ginbayad sang DPWH 6 sa third party consultant para sa mag-imbestigar sa pag-usmod sang pila ka poste sang Ungka flyover

ILOILO— Naglab-ut sa P13,480,880 ang ginbayad sang Department of Public Works and Highways (DPWH) 6 nga consulting fee sa Abinales Associates Engineers plus consultant agud mag-imbestigar sa pag-usmod sang pila ka poste sang Ungka Flyover.

Base sa kopya sang kontrata nga nakuha sang Aksyon Radyo Iloilo, tatlo ka bulan ang serbisyo sang consulting firm sa ahensya.

Ang nasambit nga pondo, separado sa P680 million nga budget para sa construction sang Ungka Flyover.

Lakip sa mga program of works sini ang pag-assess sang detailed evaluation kag detailed engineering design sang flyover, kag paghatag sang engineering intervention.

Pebrero 16 sang ginbuksan sang ahensya ang bidding para sa mga ma-apply bilang 3rd party consultant sang DPWH 6.

Ginpahayag man ni DPWH 6 Assistant Regional Director Engr. Jose Al Fruto nga tatlo ka mga bantog mga consulting firm ang nagpasakop sa bidding apang nagda-og ang Abinales Associates Engineers plus consultant.

Gintinguhaan sang Aksyon Radyo Iloilo nga makuhaan sang pahayag ang DPWH 6 apang wala nagasabat si Fruto.