Third party consulting firm nagplastar sang tatlo ka pamaagi sa pagkay-o sang kontrobersyal nga Ungka flyover

ILOILO CITY — Tatlo ka pamaagi ang ginpresentar sang Abinales Associates Engineers plus Consultants sa pagkay-o sa kontrobersiyal nga Ungka Flyover.

Nag-hire sang third party consultant ang Department of Public Works and Highways 6 agud imbestigaran ang rason sang pag-usmod sang tatlo ka hiligi sang Ungka Flyover.

Ginpresentar ini ni Engr. Adam Abinales, chief operating officer sang third party consultant, sa meeting sang Regional Development Council kahapon, Mayo 15.

Sa una nga pamaagi, mabutang sang dugang nga bored piles ukon pilote sa tatlo ka mga may depekto nga haligi –ang ika-apat, ika-lima, kag ika-anum nga haligi.

Ginpaathag ni Abinales nga ang una nga pamaagi amo ang pagkakas sang girders sang ika-apat, ikalima kag ika-anum nga haligi sang flyover kag maggamit sang jacketing agud masulod ang dugang nga board pile ukon pilote paagi sa paggamit sang mga daku nga equipment.

Samtang ang ikaduha nga pamaagi amo ang pag-provide sang portal frame ukon tukod sa nasambit nga tatlo ka hiligi. Ang ika-tatlo naman nga pamaagi ang underpinning ukon pag-inject sang semento sa tatlo ka haligi.

Wala naman ginakonsiderar sang ahensya kag consulting firm ang ikaduha kag ikatatlo nga pamaagi tungod mangin daku nga pagpanghangkat sa mga karsada nga gina-agyan sang mga residente pakadto kag pagguwa sa Iloilo City kag Pavia.

Ginpahayag man ni Abinales nga nagakinahanglan sang minimum nga P250 Million nga pondo para sa pagkay-o sa flyover nga magalawig sang 10 ka bulan.

Sa nasambit man nga meeting, gin-report sang consulting firm nga natukibaan nga naga-usmod ang 16 tanan ka haligi kag mas mataas sa ika-apat, ika-lima, kag ika-anum.