Detour road sa idalum sang Oyungan bridge sa Miagao temporaryo nga indi maagyan sang mga dalagku nga salakyan tungod sang mataas nga level sang tubig

ILOILO — Temporaryo nga indi maagyan ang detour road sa idalum sang Oyungan Bridge sa Miagao tungod sang pagtaas sang level sang tubig nga dala sang sige-sige nga pag-ulan halin pa sang Martes sang gab-i.

Suno kay Engr. Franco Carlo Monteclaro sang Municipal Disaster Risk Reduction and Management Office (MDRRMO Miagao), sa detour road nagalabay ang mga salakyan nga nagabug-at sang masobra sa 10 ka tonelda.

Sa Bailey bridge naman suno sa iya naga-agi ang mga salakyan nga nagabug-at sang manubo sa 10 ka tonelada.

Ginpahayag ni Monteclaro nga pila ka mga dalagku nga salakyan ang nagbalik na lang sa ila ginhalinan sang nakita nga alang-alang sila makatabok sa detour road.

Ginbutangan sang Bailey bridge kag detour road ang Oyungan Bridge tungod na-damage ini sang naglaslas ang bagyo Paeng sang nagligad nga tuig.