Bangkay ginhal-id sa kilid sang karsada sa San Joaquin

ILOILO — Nasapwan ang bangkay sang lalaki nga ginhal-id sa kilid sang karsada sa Brgy. Qui-anan, San Joaquin kaina sang aga, Hunyo 3.

Naputos sang garbage bag ang ulo sang biktima nga wala pa ma-identify.

Posible ginkuga-patay ang lalaki suno kay PMSg Hector Sandig, Jr., imbestigador sang San Joaquin Municipal Police Station.

Sa initial nga imbestigasyon sang SOCO suno sa pulis, wala sang nakita nga pilas sa biktima magluwas lang sa strangulation marks.

Ginsaysay ni alyas Ed, ang una nga nakakita sa biktima, nga padulong siya sa iya uma agud mag-ubra na kuntani sang nalabayan ang bangkay.

Wala man sang may nabatian nga lupok ang mga residente sa palibot apang sa dugang nga pagpangusisa, may nakabati suno kay Sandig nga daw may ginhaboy sa area pasado las-4 sa kaagahon.

Isa ka metro lang ang distansya sang lawas halin sa kilid sang dalan.

May tribal tattoo sa wala nga abaga kag tattoo sang damang sa tuo nga abaga ang biktima. May yara man tattoo sa likod kag rose tattoo sa wala nga tiil.

Ginabanta nagataas ang bangkay sang 5’1.

May suksok nga puti nga t-shirt kag maong pants ang nasapwan.

Gindala sa Cescar Funeral Homes sa San Joaquin ang bangkay. —via Justice Savvanah Pamplona