Driver sang motorsiklo patay sang nakabunggo sa taytay kag sa nagabisikleta sa San Miguel
ILOILO — Naglapaw sa gutter sang karsada kag nakabunggo sa approach sang taytay ang motorsiklo sang 70-anyos nga lalaki sa Barangay 10, San Miguel, Iloilo pasado las-6 kagab-i, Hunyo 8.
Wala gid natabangan si Marcelo Hervias nga gindeklarar nga dead-on-arrival sa ospital tungod sa iya patal nga pilas sa ulo.
Pilason naman si Marcelo Sabanda, 57-anyos sang amo man nga barangay nga nagamaneho sang mountain bike nga nadalasa ni Hervias. Napilasan siya sa ibabaw sang iya wala nga mata, wala nga abaga, kag may paso man sang tambutso sang motorsiklo sa wala nga tuhod.
Suno kay Police Master Sergeant Richie Alcala, traffic investigator sang San Miguel Police Station, nagapapuli na si Hervias sang natabo ang aksidente.
