ILOILO CITY – Nagbakal lang si Oliver Embang Parreñas, 22, sang diaper para sa iya bata sang nalakip siya sa mga nadalasa sang water tanker truck nga nagresulta sa iya kamatayon sa Brgy. Baldoza, La Paz sang Hunyo 11.
Ini ang ginsaysay ni alyas Nene nga live-in partner ni Oliver.
Suno kay Nene, mabudlayan gid siya tungod isahanon na lang siya nga masagod sa ila isa ka tuig nga bata. Manugbata pa si Nene sa masunod nga bulan sa ikaduha nila nga bata ni Oliver.
“Ginhambalan ko siya (Oliver) nga gamay na lang ang diaper ni Bea [nga bata namon]. Tapos nagguwa siya. Natingala lang ko nga kadugay sa iya magbalik [tubtob] nga gintawag lang kami [sang barkada ni Oliver],” suno kay Nene.
Samtang ginpabutyag naman si alyas Inday, 15, nga gintiklod siya ni Oliver agud indi madalahig sang nagpangdalasa ang water tanker truck. Si Inday ang nagabusong sang anum ka bulan.
Suno kay Inday, nagatambay sila sa lugar tungod naglantaw sang una nga nabungguan sang water tanker truck ang tricycle, lechon stand, kag parte sang botika.
Pagkatapos sini, ginguyod sang rescue truck ang water tanker truck nga ginmaneho sang head sang Urban Search and Rescue sang City Disaster Risk Reduction and Management Office (CDRRMO) agud kuntani mapahigad apang wala naka-neutral ang kambiyada sini rason nga nag-andar kag nag-accelerate kag nadalasa ang 19 ka mga indibidwal sa higad sang dalan nga nagalantaw sa aksidente. Sa 19, duha ang napatay lakip na si Oliver.
Wala na sila nakapangaman, suno kay Inday, tungod madasig lang ang hitabo. Kun wala siya suno sa iya gintiklod ni Oliver, posible nga lakip man siya sa mga napatay.
Nagpanawagan naman si alyas Nonoy nga amay sang live-in partner ni Oliver nga kuntani mabuligan ang iya bata sang Iloilo City Government tungod wala man siya sang trabaho.
Nagapangabay man siya nga kun mahimo mabuligan si Nene sa galastuhon sa pagbun-ag sang ikaduha nila nga bata ni Oliver kag mahatagan man sang trabaho si Nene agud may isagod sa ila kabataan.
