Transgender nagreklamo nga ginbastos sang taxi driver nga iya ginsakyan

ILOILO CITY— Kakulba kag kahangawa ang nabatyagan sang transgender nga si alyas Kenny nga nagreklamo ginbastos sang driver sang taxi nga iya ginsakyan halin sa City Proper padulong sa Lapuz kahapon, Hunyo 19.

Suno kay Kenny, nagproseso siya sang iya mga papeles para sa passport registration kag sang natapos na, nagsakay siya sa taxi nga nagahulat sang pasahero sa Quezon Street, City Proper.

“Hambal ko, ‘ano man daw sobra man ni kainit man. Ma-taxi na lang ko guro ay kay grabe gid ‘ya ang init. Taga-Lapuz ko daan so alang-alang man nga maglakat-lakat pa ko, lawig pa ang akon lakton kag damo pa ko “shortcutan.” So nag-taxi na lang ko kay para dasig kag dayon makapahuway man ko,” pagsaysay ni Kenny.

Nagpungko sa front seat sang taxi si Kenny kag naghambal siya sa driver nga mapadul-ong sa Progreso, Lapuz.

Ginpabutyag niya nga pag-abot nila malapit sa Iloilo Central market, gulpi lang ginbuksan sang driver ang iya cellphone kag naglantaw sang binastos nga video samtang naga-drive kag nagakaon sang ice cream.

Pagkatapos sini suno kay Kenny, “didto na siya dayon nagpabati-bati nga daw indi na bala manami [nga mga tinaga sang kabastosan].”

“Ang akon gina-worry makapanaug ko bala nga safe. Budlay na ya bala basi manaug ko bala sa indi ko ginhambal nga sa diin bala [nga lugar], matingala siya. Amo man ‘na nga gaduha-duha pa ko that time kay ga-video ko. Bali ang akon na lang gid ya nga gina-worry ang safety ko,” suno pa kay Kenny.

Sa video nga kuha niya, nabutang ang cellphone sa atubang sang kambyada samtang may ginalantaw nga video nga binatos.

Pag-abot sang taxi sa Lapuz Norte, “daw madiretso siya sa Bo. Obrero,” suno kay Kenny bisan sa Progreso lang siya naghambal nga mapadul-ong gani natingala man siya sa motibo sang driver.

Gindugang niya nga pag-abot naman nila sa atubang sang simbahan sa Lapuz, gulpi lang ginbutong sang driver ang iya nga kamot, “Hambal ko [sa iya] ‘may migo ko sir’ amo na. Ginhambalan ya ko dayon nga ‘may asawa na ko gani kag bata’.”

Nadugangan ang kakulba ni Kenny sang ginbutong ang iya nga kamot sang driver. Nagpanaug si Kenny sa covered gym sang Progreso.

Wala na niya nakuha ang plate number sang taxi tungod sa kakulba pero natandaan niya nga puti kag pula ang color kag ginabanta naga-edad sang 29 tubtob 31 ang driver.

Una nga gin-post ni Kenny sa iya Facebook account ang video sa ginhimo sang taxi driver agud paandaman ang netizens kag indi masulit ang natabu sa iya.