ILOILO CITY – Wasak ang una sang SUV nga nakabunggo sa poste sang telco sa corner Del Pilar-Locsin streets sa Molo Plaza mga la-una kaina sang kaagahon.
Suno kay PMSg Eduard Barrida, imbestigador sang Traffic Enforcement Unit sang Iloilo City Police Office, wala napilasan ang babaye nga driver. Halin suno sa iya sa Baluarte area ang salakyan kag pakadto sa direksyon sang City Proper.
Posible suno sa traffic investigator nga madasig ang dalagan sang salakyan kag wala na ma-control sang driver ang manibela gani nga nagdiretso, imbes nga magliko patuo, kag nakabunggo sa poste.
Base naman sa impormasyon sang mga pulis nga nagresponder, nanugid ang driver nga madasig ang iya padalagan tungod ginalagas niya ang iya bana nga nakita niya nagguwa sa lodging house.
Wala man nagasablag sa dalan ang SUV, pero gina-abisuhan ang mga nagalabay sa Molo Plaza nga halin sa southern Iloilo nga maghinay-hinay lang agud makalikaw sa disgrasya.
