ILOILO — Pilas sa nagkalain-lain nga parte sang lawas ang naagum sang mag-asawa nga senior citizens sang ginsulod sa ila balay kag ginpangbuno sa Brgy. Poblacion, San Dionisio, Iloilo pasado la-una kaina sang kaagahon.
Ginkilala ang mga biktima kanday Leopoldo Esquibel, 72-anyos, kag Connie Esquibel 69-anyos.
Suno kay PCapt. Soviet Torre, OIC sang San Dionisio Municipal Police Station, pasado la-una sa kaagahon sang nagbugtaw ang asawa agud mapa-CR sang nakita nga may tawo nga nakasulod sa ila balay.
Gintawag sang asawa ang iya bana agud magpangayo sang bulig pero nalab-ut na siya sang buno sang suspect.
Pagkaguwa sang bana sa ila kuwarto, siya naman ang ginbuno sang suspect.
Nakapangayo sang bulig ang mag-asawa sang nagpalagyo ang suspect gani nga nadala sila gilayon sa Sara District Hospital.
Out-patient ang bana samtang gindala sa ospital sa Iloilo City ang asawa para sa dugang nga pagbulong.
Na-recover sa balay sang mag-asawa ang kitchen knife nga gingamit sa krimen kag tsinelas sang suspect.
Ginkumpirmar sang hepe nga may ginadudahan na sila nga suspek pero nagapadayon pa ang imbestigasyon.
Wala naman sang may gin-report nga nadula sa balay sang mag-asawa.
