ILOILO CITY — Todo ang panginwala sang 43-anyos nga subject sa drug buy bust operation sa Brgy. Monica-Blumentritt, City Proper nga iya ang mga suspected shabu nga na-recover sang mga operatiba.
Ginhimo ang buy bust operation sang Station Drug Enforcement Team sang City Proper Police Station pasado las-7 kagab-i, Hunyo 29.
Ginpahayag sang subject nga si Ryan Vital, nga nagahigda siya sa sofa sa sulod sang ila balay sang nagsulod ang mga operatiba.
Gin-alegar niya man nga ginkastigo siya sang mga otoridad kag ginpilit isulod sa iya bulsa ang mga items.
Na-recover kay Vital ang lima ka sachets sang suspected shabu kag P2,500 nga buy bust money.
Ginatinguhaan pa sang Aksyon Radyo nga makuhaan sang pahayag ang police may kaangtanan sa alegasyon sang subject.
WALA GINKASTIGO
Ginpanginwala ni Police Captain Peter John Ramos, hepe sang City Proper Police Station nga ginkastigo sang mga operatiba ang subject sa drug buy bust operation.
Nagdepensa si Ramos nga wala nagapangkastigo ang mga operatiba sang Station Drug Enforcement team nga naga-conduct sang mga operasyon.
Ginpabutyag ni Ramos nga kun may mga naagum man nga pilas si Vital, tuga ini sang iya pagwaras kag wala nila ginkastigo.
“Ang inyo kapulisan naga-observe kita sang Human rights. Which is nga to the maximum nga level sang pagdakup naton sa aton mga suspetsado, as much as possible nga indi naton sila masakit. [Ang iya mga pilas] probably sa iya pagwaras, nakabunggo to siya. Probably ang iya na ‘ya actions,” paathag ni Ramos.
Suno sa police, ipaidalum sa medical examination ang subject antes i-detain. — via Aksyon Dave Bucayan
