Nag-abut sa Dumangas port mga pasado las-12 sang kaagahon ang mag-amay nga ginatudlo suspect sa pagpatay sa anay seaman nga si Cezar Dipus, Jr. sa Barangay Pagdugue.
Una nga nag-surrender ang amay nga si Jesus Dipus Jr. sa Police Station sa Bacolod City.
Nagsungka man ang bata nga si Jesus Philip, nga nagpanginwala sang kahilabtanan sa krimen. Nanindugan man siya nga wala siya nakahibalo sang natabo.
Gin-ako ni Jesus Dipus, Jr., 63-anyos ang pagpatay sa iya bayaw nga anay seaman nga si Cezar sang Hunyo 28.
Suno kay Police Chief Master Sergeant Kim John Banzon, chief investigator sang Dumangas Police Station, “Makita niyo si tatay Jesus, aminado gid nga nag-ako nga siya ang may kahilabtanan ukon siya gid ang natungdan sa pagtiro sa iya man nga pakaduha [kag] at the same time bayaw niya man gali nga si Cezar Dipuz, Jr. Pero ginpanginwala niya nga may kaangtanan ang iya nga bata. According sa iya, gindala niya lang sa pagpalagyo ang iya nga bata bangud nahadlok siya nga siya ang paukpan sang nabilin nga pamilya sang biktima.”
Ginpahayag ni Banzon nga las-12 kahapon sang udto, Hunyo 29 sang ginpahibalo sila sang Police Station 4 sa Bacolod City nga nag-surrender si Jesus gani gilayon sila nga nagtabok agud sugaton ang suspect.
Pero suno sa police, nagsungka man mga las-9 kagab-i ang bata ni Jesus nga si Jesus Philip, gani dungan nga ginturn-over ang mag-amay sa Dumangas police kag gin-transport pa-Iloilo.
Sa pagpangusisa sang police, ginsipa ni Jesus ang pwertahan sang balay ni Cezar agud buksan kag gintiro ang biktima gamit ang 357 caliber revolver.
Nagsupot nga kaakig kag daan nga hiligut-anon ang ginalantaw nga motibo sang police sa krimen.
Lakip diri suno sa police nga antes ang insidente, ginsaway ni Cezar ang bata ni Jesus nga si Philip nga nagasag-ub sang tubig sa bubon kag may mga ginbuy-an nga mga malain nga tinaga.
Yara na sa custody sang Dumangas Municipal Station ang mag-amay.
