ILOILO — Patay ang construction worker sang ginwasay sang makapila ka beses sa ulo kagab-i, Hunyo 29.
Ginkilala ang biktima kay Karl Orsilino, 48 anyos sang Brgy. Acuit, samtang suspect si Ramel Palete, 35 anyos, residente man sang nasambit nga barangay.
Natabo ang insidente las 8:50 kagab-i suno kay Police Major Jose Nemias Pamplona, hepe sang Barotac Nuevo Municipal Police Station.
Sa initial nga imbestigasyon sang Barotac Nuevo police, may daan nga hiligut-anon ang biktima kag ang suspetsado.
Ginpahayag ni Major Pamplona nga antes natabo ang insidente, lunsay naka-inom sang makahulubog nga ilimnon ang biktima kag ang suspetsado.
Nagsumalangay suno sa iya ng duha tubtob nga nagba-isay.
May dala si Orsilino nga malaba nga kutsilyo samtang wasay naman ang gingamit ni Palete.
Sa impormasyon ni Pamplona, naunahan han-os ni Palete si Orsilino sang wasay sa ulo sang makapila ka beses.
Nag-conduct sang hot pursuit operation ang kapulisan kagab-i apang kaina sang aga, nag-surrender ang suspect sa Barotac Nuevo Police Station.
Natalana naman nga ipa-autopsy ang bangkay ni Orsilino suno pa kay Major Pamplona.
