ILOILO — Gin-identify sang police ang suspect sa pagpatay sa 33-anyos nga caretaker sang pantatan nga nasapwan sa kamalig sa Sitio Bulod Dos, Barangay Pulao, Dumangas sang Hunyo 30 sang aga.
Suno kay Police Master Sergeant Ramon Baylon, Jr., imbestigador sang Dumangas Municipal Police Station, ginatudlo si Bryan Echalar, 36-anyos sang Brgy. Kansilayan ang nagpatay kay Allan Jay Adorador.
Gin-ako ni Echalar sa iya amay nga siya ang nagpatay sa biktima pero wala na gindetalye ang rason sa krimen, suno sa police.
Sa follow-up operation sang police, nakita nila ang sweater ni Echalar nga nabilin malapit sa iya balay kag may dugo.
Tungod sini, gindala sang police ang sweater sa crime laboratory sang Regional Forensic Unit agud ipa-idalum sa cross-matching sa dugo nga nakuha sang Scene of the Crime Operatives (SOCO) sa crime scene.
Ginpabutyag sang testigo nga si Alyas Junjun nga ginsuksok pa ni Echalar ang sweater las-9 sang gab-i antes nasapwan ang biktima nga patay na sa kamalig pagkasunod nga adlaw.
Wala pa mahibaluan sang police kun diin na si Echalar, pero suno sa iya amay posible nagpadulong siya sa Igbaras.
