Mga municipal employees, barangay officials sa Zarraga ipaidalum sa random drug test

Wala ginatolerar sang Local Government Unit sang Zarraga ang illegal drug activities sa ila banwa ilabe na kun barangay officials ang involved.

Reaksyon ini ni Zarraga Mayor Jofel Soldevilla sang nadakpan sa drug buy bust operation kaina sang aga si Inagdangan Centro Punong Barangay Bernard Galache.

Wala nagdumdom si Soldevilla nga involved sa illegal drug activities si Galache tungod wala man siya sang nakita nga problema sa kapitan kag wala man suno sa iya sang malain nga record.

Pero ginbuyagyag sang alkalde nga nalakip sa watch list sang Joint Municipal Peace and Order Anti-Drug Abuse Council si Galache.

Gin-istorya man suno sa iya sang mga otoridad ang kapitan agud ma-validate ang mga impormasyon kun involved siya sa illegal drug trade apang ginpanginwala niya ini.

Sa masunod nga semana, magasapol si Soldevilla sa taga-DILG agud istoryahan kun ano ang himuon kun may barangay official nga maangut sa illegal drugs.

Ma-conduct man ang Zarraga LGU sang random drug test sa mga empleyado sang munisipyo kag mga barangay officials.