Terminal sa diin matingub ang mga tricycles, taxis, modernized buses agud mag-cater sang mga pasahero halin sa Dumangas RoRo Port bantayan sang police 24/7
ILOILO – Guwardiyahan sang Dumangas police 24/7 ang transport terminal nga ipahamtang sang local government unit sa diin matingub ang mga taxis, tricycles, kag modernized buses nga maga-cater sang mga pasahero halin sa Dumangas RoRo port.
Suno kay Dumangas SB Member Nelson Nalleca, chairman sang Committee on Transportation sa Sangguniang Bayan, may kaugalingon nga linya ang mga tricycle, taxis, kag modernized buses kag nakadepende na sa mga pasahero kun diin sila masakay.
Ipahamtang ang terminal sa bakante nga lote sa sulod sang compound sang Philippine Ports Authority (PPA).
“Mapahamtang kita dira sang transport terminal sa outside sang perimeter fence sang PPA kag butangan naton dira sang area ang para sa Aerostar, taxi, kag tricycle. At the same time pahamtangan naton dira sang PNP personnel 24/7 kag Police Assistance Center nga amo ang magabulig [pasiguro] sa kalinong kag katawhay sa aton nga mga pasahero kag mga drivers,” suno kay Nalleca.
Ginpahayag pa sang opisyal nga mga pasahero nga nagapauli sa Dumangas lang ang dapat akomodaron sang mga tricycles, samtang hilway naman nga makapili kun taxi ukon modernized buses masakay ang mga pasahero nga mapadulong sa diin man nga lugar sa Panay.
Ma-meeting pa ang Dumangas LGU, representatives sang taxi, modernized buses, kag tricycle agud ma-finalize ang pagpatuman sini.
Ini ang solusyon nga ginplastar sang LGU sa madugay na nga reklamo sang mga taxi drivers nga ginakilkilan kag gina-harass sang mga tricycle drivers kun magkuha sang pasahero halin sa RoRo port.
