Pick up nga may karga nga 20 ka sako nga feeds nagbaliskad sa Zarraga

ILOILO — Nagbaliskad ang pick-up nga may karga nga 20 ka sako nga feeds sa Brgy. Dawis Centro, Zarraga las-12:40 kahapon sang hapon, July 25.

Ginkilala ang driver sang pick-up truck kay Carl Rofred Padrigo 31-anyos sang Brgy. Dolores, Dumalag, Capiz.

Suno kay Police Captain Raffy Señeres, hepe sang Zarraga Municipal Police Station halin sa Iloilo City si Padrigo kag pakadto sa Pototan sang nadisgrasya ang ginamaneho nga salakyan.

Posible nga napiyungan si Padrigo tungod suno sa iya nakibot siya nga yara na siya sa kilid sang dalan kag nasagaidan ang street light.

Ginwarik pa ni Padrigo pabalik sa dalan ang salakyan pero nag-isi-isi ini kag nadulaan sang kontrol tubtob nga nagbaliskad

Nakaagum sang pilas sa tuo nga butkon si Padrigo pero nagpamalibad na nga dal-on sa ospital, suno kay Señeres.