2 patay sa engkwentro sang mga suldado kag NPA sa Leon
ILOILO — Naka-engkwentro sang mga suldado sang 61st Infantry Battalion, Philippine Army ang mga miembro sang CPP NPA sa Brgy. Tagsing, Leon las-6:20 kahapon sang aga, Hulyo 29.
Apat ka miembro sang Sibat Platoon, Southern Front, Komiteng Rehiyon-Panay, ang involved sa inaway, suno sa Army.
Naglawig sang lima ka minutos ang engkwentro nga nagresulta sa pagkapatay sang duha ka NPA members.
Sa report sang Philippine Army, may na-recover nga mga war materials, lakip ang isa ka improvised M16 rifle, duha ka shotguns, isa ka caliber 45 pistol, anti-personnel mines, kag mga blasting caps. May nakita man nga isa ka NPA flag kag apat ka backpacks nga naga-unod suno sa Army sang extortion letters kag mga subversive documents.
Nagapasalamat si BGen Michael G Samson, commander sang 301st Infantry Brigade, sa mga residente nga nagahatag sang impormasyon sa mga tropa.
“This encounter serves as a resounding confirmation that ending the decades-long insurgency is a collective responsibility. The support and cooperation of the people have thwarted the NPA’s extortion activities. Their bravery in standing up against these communist terrorists fuels our commitment to realize their earnest desire for a peaceful and prosperous community,” suno kay BGen Samson.
Ginakumbinser ni Samson ang nabilin nga NPA rebels nga magbalik sa gobyerno agud malikawan nga mapareho sa ila napatay nga mga kaupod nga naka-engkwentro sang military.
GIN-IDENTIFY SANG PAMILYA
Gin-identify sang ila pamilya ang bangkay sang duha ka lalaki nga napatay sa encounter sa tunga sang NPA kag Philippine army sa Barangay Tagsing, Leon kaina sang aga.
Ginkilala ang duha ka napatay nga kanday John Eric Talibo, 26-anyos residente sang Barangay Indaluyon, Igbaras kag Jenny Fariolan sang Cabalaunan, Miagao.
Suno kay Police Captain Danilo Noca, hepe sang Leon Police Station, ang amay gid ni Talibo ang nag-identify sang iya bangkay.
Samtang ang mga utod naman ni Fariolan ang nagkumpirmar sang iya bangkay.
Base sa impormasyon sang pulis si Talibo ang nag-lisensya sa iya amay nga mapa-Manila.
Tatlo ka tuig nga wala makapauli na sa ila balay si Talibo.
Sa pihak sini, may impormasyon nga nabaton ang iya amay nga nagsulod sa NPA ang iya bata.
Si Fariolan naman ang 12 ka tuig na nga wala makapauli sa iya pamilya.
Naga-contact man suno kay Noca ang duha ka napatay pero wala nagpanugid nga nagsulod sa NPA.
Gindala na sang ila mga pamilya ang bangkay sang duha.
