Lalaki nga pasahero naglumpat sa modernized boat nga pakadto sa Buenavista, Guimaras

ILOILO CITY — Naglumpat halin sa modernized boat nga pa-Guimaras ang lalaki nga pasahero mga las-5:40 kahapon sang hapon, Agosto 4.

Halin sa Parola Wharf ang modernized boat kag padulong kuntani sa Buenavista, Guimaras.

Suno sa tindera nga nakakita, nagahana pa lang nga magtadlong ang modernized boat paguwa sa baybay sang naglumpat ang lalaki.

Gilayon nga nagbalik ang modernized boat sa wharf kag ginpasaylo sa lain nga sakayan ang iban nga mga pasahero.

Nagbulig sa pagpangita sa lalaki ang Philippine Coast Guard pero wala pa siya nakita.

Ginkumpirmar ni Coastguard- Iloilo Commander Paterno Belarmino, Jr. nga gin-identify sang iya pamilya ang naglumpat nga si Ronnie Elgario, 41-anyos sang Brgy. Corucuan, Igbaras.

Suno kay Belarmino, nagpadulong sa ila opisina las-10 kagab-i ang pamilya ni Elgario kag ginpabutyag nga siya ang lalaki nga naglumpat.

Nagapadayon subong nga aga ang search and retrieval operation sang Coastguard sa lalaki. —via Angel Mae Ciudad/John Dave Tabares