ILOILO CITY — Ipatawag sang Committee on Moral Recovery sa Iloilo City Council ang mga tag-iya sang restobars sa Smallville Complex sa San Rafael, Mandurriao tungod sa nag-viral nga video sang babaye nga nagasaut sa ibabaw sang bangko nga nagasuksok lang sang panty sa idalum samtang gina-alsa ang iya nga t-shirt.
Suno sa chairman sang komitiba nga si Councilor Johnny Young, wala siya nanami-an sa video tungod posible nga makahatag ini sang “wrong impression” sa isa ka Ilongga.
Ginpabutyag niya nga dapat ginalimitahan sang management ang paghatag sang makahulubog nga ilimnon sa mga customer, ilabe na kun makita na nila nga indi na makontrol ang kahulugbon agud indi na masulit ang kasubong nga hitabo.
Naglapta sa social media ang video sang babaye nga nag-ani sang negatibo nga reaksyon sa madamo nga netizens.
Sa video nga nakuha sang netizen, ginsaway sang bouncer ang babaye sang nakita siya nga nagsaka sa bangko kag nagasaut.
